Aqmescit – Qırım mekteplerniñ ocaları bildirgenine köre, ukrain kitaplarını qullanğanları içün büyük para cöremelerinen qorquzalar. Qırım tasil Nazirliginiñ hadimleri bunen bağlı sualge doğrudan-doğru cevap bermeyler.
Qırım mektepleriniñ birinde ukrain sınıfında ders bergen ocalardan biri Qırım.Aqiqatqa bildirgeni kibi, Ukrainada çıqqan bütün kitaplar oquv yılnıñ başında tahliye etilgen ediler. Ocalarnı ise tenbiyelediler: ruhsetsiz kitaplarnı qullansalar 200 biñ ruble miqdarında para cöremesini töleycekler.
«4 ukrain sınıftan mektebimizde tek eki qaldı, olarğa da mektepni bitirmege bermeyip, qapatırlar, dep qorqam. Men bellesem, bu kibi vaziyet tek bizim mektebimizde degil», – dep ayttı oca. Onıñ malümatına köre, mektepte ukrain sınıflarnı ana-babalarnıñ birlikte yazğan arizası ile qaldırdılar. Sınıfta tek eki ukrainli olıp, qalğanları ruslar, qırımtatarlar ve yunanlar oquylar.
Oca, balalarğa ukrain tilinde tasil alıp, rus kitaplarnı işletmege küç olğanını ayta. «Ukraina tarihı boyunca kitaplarnı yasaq etkenleri daa añlaşıla, – dey o. – Amma, riaziyat, fizika, geometriya, kimiyanı ne sebepten yasaq eteler? Qanunlar, teoremalar, kimik formuları rus kitaplarında bir, ukrain kitaplarında başqa yoqsa? Yañı kitaplar peyda etilmegen zamanına qadar, olarnı qaldırmaq mümkün edi».
Ocanınıñ bildirgenine köre, yılnıñ başında o derske azırlanğanda rus kitabından mevzunı alıp, ukrain tiline çevirip, soñra balalarğa anlata edi. «Balalar tamam böyle şekilde ev vazifesini tercime ete ediler. Endi olarğa ev vazifesini rus tilinde yazmağa ruhset etem. Ukrain sınıfında ders böyle olurmı? Ukrain tilinde tek tahtada künni ve sınıf vazifelerini yazamız», – dey oca.
Qırım tasil Nazirliginde Qırım.Aqiqatqa bildirilgeni kibi, bu kibi vaziyet qırımtatar tilli sınıfarında da yüz berdi, mında tek federal cedvelinden kitaplarnı qullanalar. İstisna olaraq ukrain, qırımtatar tilleri ve edebiyatları derslerini Ukrainada çıqqan kitaplar boyunca alıp barmağa izin berile. Büyük para cöremeleri aqqında malümatnı teşkermege imkân yoq edi – Tasil nazirlikniñ hadimleri doğrudan-doğru cevapnı bermediler.
