Link açıqlığı

Saatnıñ esas haberi

Zemaneviy Rusiyede Qırım tarihı boyunca ilk ilmiy monografiya noyabr 19 künü taqdim etildi. TASS bildirgeni kibi, 450 saifeli iş «yarımadanıñ qadimiy devirlerden bugünge qadar tarihını qaplap ala».

Rusiye arbiy-tarihiy cemiyeti tarafından neşir etilgen «Qırım tarihı»nıñ yazıluvında Moskva ve Qırımdan 13 tarihçı iştirak etti.

«Ukrainada olğan tarih kitaplarını ögrenip, şaşıp qaldıq. Qırımnıñ normal professional tarihını yazmaq içün ihtiyac peyda oldı», – dedi Rusiye arbiy-tarihiy cemiyetiniñ reisi, Rusiye medeniyet naziri Vladimir Medinskiy.

O şunı da bildirdi ki, Avropa ve Ukraianda olayatqan adiseler «tarih siyasetçiniñ hızmetçisine çevirilgenini» köstere.

«İnsanlarnıñ anlarına etilgen tesir, Ukrainada körgenimiz kibi, adamlarnı mankurtlarğa çevire», – dedi Medinskiy.

O şunı da qayd etti ki, taqdim etilgen «Qırım tarihı» Moskvanıñ eñ büyük kitap tükânlarında endi eñ satılğan kitaplar cedvelindedir.

«İnsanlar aqiqatqa muhtaclar», – dep añlata bunı Medinskiy.

«Ümüt etemiz ki, Qırım tarihı Rusiye tarihı boyunca kitapnıñ ayırılmaz bir qısmı olur», – dep qoştı nazir.

2014 senesi fevralniñ soñunda – martnıñ başında Rusiye ve Rusiyeniñ Qara deñiz flotunıñ qırım bölüklerinden ordular Qırım yarımadanı zapt ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG