Qırımda işğalden soñ 21 qırımtatarı ğayıp oldı.
Bunı noyabr 19 künü brifing devamında Ukraina SNBO haber-analitik merkeziiniñ spikeri Andriy Lısenko bildirdi.
«İşğalniñ başlanuvınen qırımtatar halqınıñ 21 vekili ğayıp oldı. Afsus ki, olarnıñ bir qısmı elâk oldı»,– dedi Lısenko.
Lısenko şunı da qayd etti ki, işbu malümat vesiqa şeklinde halqara teşkilâtlarğa berilecek eken.
Human Rights Watch halqara uquq qorçalayıcı teşkilâtınıñ soñki arizasında Rusiye Federatsiyasına qoşuluvından soñ Qırımda insan aqları ile bağlı vaziyet kergin olğanı aqqında bildirilgen edi. Arizada Rusiyeniñ Qırımdaki areketlerine qarşı çıqqan insanlarnıñ, ilk nevbette – qırımtatarlarnıñ qorquzuvı ile bağlı malümat berile.
Qırımda «İnsan aqları boyunca vekâletli» Lüdmila Lubina bularnı aqiqatqa uymağan malümat olaraq adladı.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
