Link açıqlığı

Qırım müftiyatı: musulmanlar camilerniñ ateşke berüvi sebebinden intiqam almaycaqlar


Qırımda devam etken vandalizm areketlerini ve camilerniñ ateşke berüvini sade yaramazlıq kibi tanımaq mümkün degil, dep tüşüne Qırım müftisiniñ muavini Ayder İsmailov. Böyleliknen Qırım musulmanlarını mezeplerara ziddetlerge celp etmege çalışa ekenler. Faqat qırımtatarlar intiqam almaycaqlar, dey müftiy muavini.

Bunı Ayder İsmailov Qırım.Aqiqat saytına bildirdi.

«Milletlerara, mezeplerara ayırımnı meydanğa ketirmek içün qullanılğan tarik etici areketlerdir. Çünki bir de bir halqnıñ camisini ateşke berseler, bu, tabiiy ki, nasıldır bir menfiy duyğularnı uyattıra ve mahsus cevabınıñ olmasını tahmin ete», – dey İsmailov.

Faqat, müftiy muavini aytqanı kibi, yarımdanınıñ musulman ealisiniñ 90% teşkil etken qırımtatar halqı barışıqseverdir ve bu kibi vandalizm areketleri ile oğraşmaycaq.

Evel qayd etilgeni kibi, noyabr 12-de, gece, belgisiz şahıslar Sudaq rayonınıñ Qoz köyündeki (Solneçnaya Dolina) camini camini yaqacaq oldılar.

Qırımtatar Milliy Meclis reisi Refat Çubarov camini yaqmaq ıntıluvı işğal akimiyetniñ bütün dünyanıñ qırımtatarlarğa qarşı repressiya ve basqını toqtatmaq talabına açıq bir cevabı olğanını qayd etti.

Qırım müftisi Emirali Ablayev akimiyet ve cemiyetke qabaatlı insanlarnı tapıp, cezalarnı bermege çağıruvı ile buyurdı.

XS
SM
MD
LG