Link açıqlığı

Matbuat vastaları: Mirimskiy Şimal Qırım kanalını icarege almaq içün Lojkinden yardım istegen edi


Ukrainanıñ sabıq halq deputatı, «Soyuz» firqasınıñ sabıq lideri Lev Mirimskiy Şimal Qırım kanalını icarege almaq istedi ve Ukraina prezidentiniñ memuriyetine muracaat etken edi, – dep bildirdi Qırım Cemaat palatasınıñ reis muavini, «Krımskiy ekspertnıy klub» yolbaşçısı Aleksandr Formançuk Aqmescitte olıp keçken «Avrasiya iqtisadiyat birligi: muvafaqiyet ve amelge keçirilmesiniñ problemleri» konferentsiyasında.

Bunı salı künü, noyabr 18-de, «Novosti Krıma» haber hızmeti bildire.

Aleksandr Formançuknıñ aytqanına köre, Lev Mirimskiy onıñnen teşebbüsinen paylaştı.

«Onıñ prezident Petro Poroşenkonıñ memuriyet reberi Böris Lojkin ile yahşı bir dostluq munasebetleri bar. O, uquqiy bir şahıs meydanğa ketirilip, kanalnı icarege alsa, problema çezilecegini Lojkinge de añlatmağa tırıştı. Mirimskiy bu suv parasını Ukraina devletine ödemege azır edi ve kanalnı yañıdan quracaq jdi. Lâkin Böris Lojkin bu mesele siyasiy olğanını ayttı», – dedi Formançuk.

Malüm olğanı kibi, Rusiye Federatsiyasınıñ ükümeti işğal etilgen Qırımda zarar körgen köy hocalıq istisalcılarına tazminat ödemesi içün tahminen 275 mln. ruble ayırdı. Aqımdaki senede Qırımda köy hocalığına Rusiye 600 mln. ruble ayırdı.

Ukraina Qırım suv ihtiyaclarınıñ 85% qarşılağan edi. Suv esasen köy hocalığına kete edi.

2014 senesi fevral soñunda mart başında Rusiye ve Rusiyeniñ Qara deñiz flotunda olğan askerler Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalar kirsetti. Ğarp Qırım Ukrainağa bağlı olğanını tekrarlamağa devam ete.

XS
SM
MD
LG