Link açıqlığı

Saatnıñ esas haberi

Cemilev: Qırımda Rusiye pasportıñ olmasa, yaşamazsıñ, olsa – qıtağa çıqmaq zordır


Mustafa Cemilev
Mustafa Cemilev

Ukrainağa qol tutqan qırımlılar içün Rusiye pasportı em işğal etilgen Qırımda, em de qıtaiy Ukrainada ciddiy bir problem oldı. Bunı qırımtatar halqınıñ lideri Mustafa Cemilev «Novoye vremâ» neşirine bergen izaatlarında bildirdi.

«Rusiye pasportını alğanlar Ukrainağa kelip, bir sıra problemlerge rastkeleler, lâkin Ukrainada pasport alması Ukraina vatandaşlığından vazgeçkenini ifadelemey», – dedi o.

Mustafa Cemilevniñ aytqanına köre, bu mesele Ukraina akimiyeti tarafından teren bir talil keçirilmesine muhtac, bundan soñra Ukraina qanunlarında deñişmeler yüz bere bile.

Aynı vaqıtta Qırım vatandaşları Rusiye pasportını almağa mecbur qalalar, çünki başqaca ne yaşamaq, ne de çalışmaq imkânları qala.

«Bazıları soñuna qadar dayanalar, lâkin Rusiye pasportıñ olmasa, tedaviylenmege bile imkân yoq. Adamlarnıñ başqa bir de bir çaresi qalmay», – dep ayta Cemilev.

Qırımda qırımtatarlarğa qarşı basq devam ete, Ukrainağa qol tutqan Qırım sakinlerini, hususan qırımtatarlarnı yarımadanı terk etmege mecbur eteler.

2014 senesi fevral soñunda mart başında Rusiye ve Rusiyeniñ Qara deñiz flotunda olğan askerler Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalar kirsetti. Ğarp Qırım Ukrainağa bağlı olğanını tekrarlamağa devam ete.

XS
SM
MD
LG