Link açıqlığı

Qırımda Büyük Cuma-Cami qurucılığı meselesine Putin kirişe bile


Remzi İlyasov, Qırım «Devlet şurası» reis muavini

Aqmescitte Büyük Cuma-Cami qurucılığı meselesi Türkiye prezidenti Recep Tayip Erdoğan ve Rusiye prezidenti Vladimir Putinniñ körüşüv mevzusı olması mümkün. Bu aqqında Qırım «Devlet şurasınıñ» reis muavini Remzi İlyasov salı künü, noyabr 18-de, matbuat konferentsiyasında bildirdi, – dep haber ete Qırım.Aqiqat saytınıñ mühbiri.

«Bugünki künde böyle bir malümat bar: Türkiye ve Rusiye Federatsiyası prezidentleriniñ körüşüvi planlaştırıla, tedbirde bu mesele de baqılacaq, çünki Türkiye Cumhuriyeti bu camini qurmağa vade etken edi», – dedi İlyasov.

Bu arada «spiker muavini» Büyük Cuma-Cami qurucılığı meselesi «musulmanlar içün ğayet ağır mesele» olğanını qayd etti.

İlyasovnıñ Tataristan ve Çeçen cumhuriyetini ziyaret eter eken, andaki yerli camilerniñ qurucılığınen meraqlandı.

«Olarnı maqtaylar ve aman-aman ayn camini Qırımda da körmek isteyler. Camini qurmaq kerek, Qırımda bir de bir problemler, şu cümleden farqlı dinlernen bağlı meseleler olmağanını köstermek içün, ve bu meseleni baqmalı. Men Qırım musulmanları müftisi Hacı Emirali Ablayev ile körüşip, bu mevzunı qonuştım. O, vaziyetni añlay», – dedi spiker muavini.

Hatırlatamız, 2011 senesi baş nazir vazifesinde Vasiliy Cartı olğan vaqıtta Aqmescitteki Yaltinskaya, 22 adresi boyunca Büyük Cuma-Caminiñ temel taşı qoyuldı. Bundan evel bir sıra mahkeme davaları olğan edi. Soñra caminiñ maketi tasdıqlandı.

XS
SM
MD
LG