Link açıqlığı

Qırım «Devlet şurasınıñ» reis muavini Remzi İlyasov Aqmescitteki Şmidt, 2 adresi boyunca yerleşken «Qırım» Fondu» Hayriye teşkilâtınıñ binasınen bağlı meseleni al etmege yardımcı ola bile. Malüm ki, bu binada Qırımtatar Milliy Meclisi de yerleşe. İlyasov teşkilâtta olğan esnaslardan haberi olmasını istey.

Bunı o, noyabr 18-de Aqmescitte matbuat konferentsiyasında bildirdi, dep haber ete Qırım.Aqiqat mühbiri.

«Men yardımcı ola bilem ve yardım etmege azırım, lâkin anda (hayriye teşkilâtta – muarrir) olğanlardan haberim olacaq. Anda olğanlarnı bilmeyip, yardım qolunı istemegenlerge uzatmaq...», – dedi spiker muavini.

Hatırlatamız, Şmidta, 2 soqağındaki bina etrafında bir qaç aydan berli mahkeme davası devam ete. «Qırım» Fondu» hayriye teşkilâtınıñ yolbaşçısı Riza Şevkiyev emin ki, Qırım akimiyeti teşkilâtnı yoq etip, onıñ mal-mülkini alacaq ola.

Qırımnıñ medeniy miras qoruv «Devlet komiteti» tizgen memuriy protokolğa binaen, «Qırım» Fondu» hayriye teşkilâtınıñ reisi Riza Şevkiyev KoAP RF 7.13 1 maddesine köre (Rusiye Federatsiyası halqlarınıñ medeniy miras obyektleriniñ devlet imayesi ve qullanuv talaplarını bozuv) memuriy cinayet yaptı.

Bu maddege köre, teşkilât reisi 400 biñ rublelik para cezasını ala bile, «Qırım» Fondu» ise – 5 million rublelik.

Noyabr 18-de Riza Şevkiyev Qırım.Aqiqat saytına bildirgenine köre, memuriy dava boyunca onı 350 biñ rublege cezaladılar.

XS
SM
MD
LG