Link açıqlığı

Faaller Ukraina akimiyetinden Qırım içün semereli bir küreş alıp barmasını talap eteler


Cemaat faalleriniñ fikirince, Ukraina parlamentiniñ koalitsiya añlaşmasında işğal etilgen Qırımnıñ keri qaytarılmasınen bağlı maddeler tam qayd etilmegen. Koalitsiya añlaşması bu şekilde qabul etilse, Yuqarı Rada ve Nazirler şurasınıñ yarımadada nezaretni ğayrıdan tiklemek içün semereli çalışacaqlarınıñ kefaleti yoq.

Bunı «Evromaydan-Krım» areketiniñ koordinatorı Sergey Kovalskiy Qırım.Aqiqat saytına bildirdi.

«Qırım meselesinde yapılacaq areketler yoq. Aynı zamanda işbu leyhada iqtisadiya, milliy havfsızlıq ve diger saalarnıñ tam islâatlarını köremiz», – dedi Kovalskiy.

Faalniñ zanınca, koalitsiya añlaşmasında işğal etilgen Qırım meselelerinen oğraşacaq icra akimiyet organınıñ meydanğa ketirilmesi aqqında madde olmalı. Kovalskiy hatırlattı ki, işğal etilgen territoriya aqqında qanunğa binaen, böyle bir organ ta mayısta meydanğa ketirilmek kerek edi, lâkin alâ daa yoq.

2014 senesiniñ soñuna qadar Qırım territoriyası zurinden devlet suverenitetiniñ ğayrıdan tiklenmesi içün bir sıra qanun deñişlemeri teklif etilecek.

Böyle bir vade Petro Poroşenkonıñ Bloku aydınlatqan koalitsiya añlaşmasında mevcut. Vesiqa 10 maddeden ibaret. Mında akimiyetniñ Qırımnı keri qaytaruv, yarımada sakinleri ve köçip kelgenlerniñ aqlarını qoruv bar.

2014 senesi fevral soñunda mart başında Rusiye ve Rusiyeniñ Qara deñiz flotunda olğan askerler Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG