Mahkeme qararına köre, «Qırım» Fondu» Hayriye teşkilâtınıñ müdiri Riza Şevkiyev 350 biñ ruble para cezası olaraq ödemeli.
Bunı Şevkiyev noyabr 18-de Aqmescitte mahkeme toplaşuvınıñ birinci qısmından soñ Qırım.Aqiqat saytına bildirdi.
Onıñ aytqanına köre, mahkemeci qarar çıqarıp, toplaşuvğa çıqtı, al-azırda davanıñ ekinci qısmı baqılacaq – beş million rublelik para cezasıdır.
«Mence, qarar maksimal olacaq. 400 biñlik para cezasından meni 350 biñni tölemege mecbur etken olsalar, ekinci qısım boyunca 5 millionlıq para cezasından 4-4,5 million rubleni ödemege mecbur eteceklerdir», – dep qayd etti Şevkiyev.
Fond yolbaşçısınıñ zanınca, böyle etip devlet seviyesinde teşkilâtnıñ mal-mülkini zapt eteler.
Fond yolbaşçısı mezkür qarardan sebep mahkemege muracaat etecek ola.
«Lâkin, eminim, bu memleketniñ iç bir mahkemesinde adalet yoq. Soñra halqara mahkemelerge muracaatta bulunacam», – dedi o.
Hatırlatamız, sentâbr 16 künü 2014 senesi Meclis binasında rusiyeli qoruyıcı organlarnıñ vekilleri tintüv ötkerdiler. Vesiqa, USB-fleş aletleri, islam mevzusında edebiyat, bilgisayarlar, Ukraina halq vekili Mustafa Cemilevniñ şahsiy şeyleri tahliye etildi.
Sentâbr 17-de Meclis binasında «Qırım» Fondu» Hayriye Teşkilâtınıñ reisi Riza Şevkiyevge mahkeme qararını seslendirdiler. Bundan soñ «Qırım» Fonduna» ait olğan binanı qapatmaq qararları aqqında bildirdiler. Bundan sebep Qırımtatar Milliy Meclisiniñ vekilleri binanı terk etmege mecbur ediler.
Sentâbr 19-da Qırımtatar Milliy Meclisiniñ temsilcileri binanı terk etip, onı müürlemege mecbur oldılar.
Mahkeme nezaretçileri Meclis, «Qırım» Fondu», «Avdet» gazetası, «Yıldız» mecmuası yerleşken Şmidta, 2 adresi boyunca binanı tevqif ettiler. Bundan ğayrı, közeticileriniñ vesiqalarında Meclis ofisleri, em de «Qırım» Fonduna» ait olğan biger obyektler yerleşken Jidkova, 40 adresi boyunca bina da qayd etile.
Aqmescitniñ Merkeziy rayon mahkemesi «Qırım» Fondu» Hayriye Teşkilâtınıñ mal-mülki ve bank esaplarınıñ tevqifini öyle de qaldırdı. Bundan ğayrı, prokuraturanıñ qırımtatar halqınıñ lideri Mustafa Cemilevni fondnıñ tesisçileri erkânından çıqarmaq talabını yerine ketirdi.
Qırımnıñ medeniy miras qoruv «Devlet komiteti» tizgen memuriy protokolğa binaen, «Qırım» Fondu» hayriye teşkilâtınıñ reisi Riza Şevkiyev KoAP RF 7.13 1 maddesine köre (Rusiye Federatsiyası halqlarınıñ medeniy miras obyektleriniñ devlet imayesi ve qullanuv talaplarını bozuv) memuriy cinayet yaptı.
Bu maddege köre, teşkilât reisi 400 biñ rublelik para cezasını ala bile, «Qırım» Fondu» ise – 5 million rublelik.
