Link açıqlığı

Qırımnıñ öz başına tayin etilgen baş naziri Sergey Aksönov Qırım «Devlet şurası» reisiniñ muavini Remzi İlyasovnı «qırımtatar halqınıñ yetekçisi» olaraq adladı. Bu kibi bildirüvni Aksönov devlet milliy siyasetniñ amelge keçirüv meseleleri boyunca toplaşuvda seslendirdi, – dep haber ete «Novosti Krıma».

Aksönov aytqanı kibi, Qırım akimiyeti daima «Qırım» qırımtatar halqınıñ cemaat areketi ile sıq munasebetlerde buluna eken.

«Biz Eskender Bilâlov, şimdi qırımtatarlarnıñ arasında ürmetli insan sayılğan ve, menimce, olarnıñ milliy yetekçisi olğan «Qırım» cemiyet teşkilâtınıñ yolbaşçısı Remzi İlyasov ile körüşüvlerimiz keçe»,– dedi Aksönov.

Remzi İlyasovnıñ özü ise «halqnıñ ögünde itibarnı qazanmaq kerek» dep tüşüne.

«Lider olmaq içün – bunı qazanmaq kerek, halq özü qıymet keser. Bu kederli vaziyette mesülietni öz boynuma almaq ve halqımnıñ meselelerini eminliknen çezmek kerektir dep tüşündim. Şimdi nasıl yönelişke adım etmege kerek olğanını bilem. Bizde tecribe, ihtisaslı ameliyatımız bar – bu meselelerni nasıl çezmege bilemiz»,– dedi o.

«Devlet şurası» mayısta Remzi İlyasovnı «parlament» reisiniñ muavini vazifesine tayinledi.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG