Lvovda noyabr 27 künü JazzBez XIV halqara caz festivali çerçivesinde qırımtatar ve ukrain çalğıcılarınıñ kontserti ötkerilecek. Qırım.Aqiqat saytına Lvovda Krım.SOS teşebbüsiniñ azası Halil Halilov aytqanı kibi, kontsert saat 20:00 KİNO art-hollında keçecek.
«Rre-party aqşamında Usein Bekirov (Qırım, Ukraina); Şevket Zmorka (Qırım, Ukraina) – akkordeon; Andrey Kohan (Lvov, Ukraina), bas-gitara; Valeriy Kovalenko (Kiyev, Ukraina), davul, kibi caz çalğıcıları iştirak etecek. Biletlerniñ satuvından qalacaq aqça «Lvovda Qırım Evi» – qırımtatar medeniy merkeziniñ donatılmasına ayırılacaq», – dey Halil Halilov.
Bunıñ ile qırımtatar caz çalğıcıları «JazzBez. Şarqnıñ azat etilgen topraqlarında Serbestlik Muzıkası» kontsertinde de iştirak etecekler.
Bu leyhanıñ devamında leh ve ukrain caz vekilleri Slavânsk ve Kramatorsk şeerlerinde bedava kontsertler ile çıqışta bulunacaqlar. Bunıñ ile çalğıcılar Ukraina şarqında arbiy areketlerniñ zonasından on çalğıcını Lvovğa ketirip, olarnı Jazz Bez halqara festivaliniñ diger tedbirlerine celp etecekler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
