İşğal etilgen Qırımda qırımtatar akademik muzıkalı-drama teatri öz adını deñiştirip, devlet teatri olacaq.
Bunı Krım Media agentligine teatrniñ başı Bilâl Bilâlov bildirdi.
Onıñ aytqanı kibi, teatrniñ serlevası yanvar 1-den deñişecek. Bunıñ ile Bilâlov teatrde çalışqan hadimlerniñ erkânında deñişmeler olacağını da red etmey. «Menim ile añlaşma müddetini daa uzatmadılar»,– dedi Bilâlov.
Qırımda daa eki teatrniñ serlevasını deñiştirdiler. Böyleliknen, Aqmescitte Qırım akademik ukrain muzıkalı teatri endiden Qırım Cumhuriyetiniñ Devlet akademik muzıkalı teatri olacaq. Gоrkiy adına Rus akademik drama teatri artıq «Qırım akademik drama teatri» oldı.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
