İşğal etilgen Qırımda tasil, ilim ve gençlik «nazirligi» qırımtatar tili ve edebiyatı ocaları içün er aftalıq lektsiyalar keçirilmesiniñ teşebbüsçisi oldı.
«Nazirlik»niñ matbuat hızmeti bergen malümatına köre, lektsiyalar Qırımnıñ umumtasil teşkilâtlarında noyabr-dekabr aylarında keçecek.
Lektsiyalarnı «Qırım müendislik-pedagogik universiteti»niñ qırımtatar til ve edebiyatşınaslığı kafedrasınıñ ocaları keçirecek», – dep bildire Qırımnıñ öz başına tayin etilgen akimiyetiniñ «ruporı» Krıminform saytı.
«Umumtasil teşkilâtlarında ilmiy-ameliy, oqutuv-metodik edebiyatnıñ az olğanı sebebinden lektsiyalar ocalarğa qırımtatar til ve edebiyat saasında olğan yañı ilmiy araştırmalar, teñqidiy maqaleler, zemaneviy müelliflerniñ eserleri ile tanış ola bilecekler», – deyler «nazirlik»te.
Tahmin etilgeni kibi, lektsiyalar yarımada ocalarını Qırımnıñ altı regionında toplaycaq.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
