Aqmescitte ukrain şair ve yazıcısı T. G. Şevçenko abidesine er kün taze gülçemberlerni ketirler. Kobzarniñ abidesi yanında sarı küz çeçeklerniñ demetini Qırım.Aqiqat saytınıñ mühbiri fotoğa çıqardı.
Qırım işğali evelden Aqmescitte ukrain bayramları vaqtında eali, şu cümleden memurlar da, çeçeklerni Şevçenko abidesine ketire ediler. Amma mart ayında keçirilgen «referendum»dan soñra, yarımadada ukrain vatanperverliginiñ numayışı havflı adet oldı. Bu sebepten qırımlı ukrainlilerni Aqmescitte ukrain timsali olğan Kobzar abidesiniñ taqdiri raatsız ete. Kelecekte bu abideni, Aqyarda Sagaydaçnıy abidesi ile olğanı kibi, devire bileler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
