Link açıqlığı

Qırımtatar halqınıñ lideri Mustafa Cemilevniñ qarşılavında «politsiya hadimine» ücüm yapıluvda qabaatlanğan qırımtatar faali Tair Smedlâyevge tuvğanları ile körüşmege izin bermeyler.

Bunı Qırım.Aqiqat saytına qırımtatar milliy Qurultayınıñ Merkeziy saylav komitetiniñ reisi ve yaqalanğannıñ ağası Zair Smedlâyev bildirdi.

«Tuvğanlarğa qonuşmaq içün fırsat bermeyler, iç bir körüşüv daa olmadı, – dedi o.– Bulunğan şaraitlerge şikâyet etmey. Amma, tabiiy ki, kurort, yüksek keyfiyetli bir musafirhane degildir».

Smedlâyevniñ aytqanı kibi, yaqında onıñ adliyecisi Qırım Apellâtsion mahkemesiniñ soñki qararına itiraz bildirecektir. Soñra ise İnsan aqları boyunca Avropa mahkemesine muracaatlar olacaq.

«Mahkeme seviyesini ve olarnıñ ne derecede adaletli olğanını biz kördik, Rusiye uquq qoruyıcıları da bunı siyasiy sımarış olaraq adladılar, mahkemeciler ise olarnı amelge keçireler. Bunı em birinci, em ekinci – Apellâtsion mahkeme kösterdi»,– dedi Smedlâyev.

O şunı da qayd etti ki, soy-soplarnıñ fikirleri müsbet degil, olar yalıñız dünya toplulığınıñ destegine ümüt eteler.

«Biz nasıldır bir eyi perspektivalarnı qurmaymız, amma qardaşımnı episi bir azat etecekmiz. Yalıñız dünya toplulığınıñ destegine ümüt besleymiz. Çünki Rusiyede mahkeme adaleti şimdi iç te yoq. Biz bunı yaqalav kününden soñ mahkemege qadar nezaret etemiz. İşbu vaqia Rusiye Federatsiyasında, şu cümleden Qırımda da qanun olmağanını tasdiqlay, Mında saçmalıq üküm süre»,– dedi Smedlâyev.

Qırımtatar milliy Qurultayınıñ Merkeziy saylav komissiya reisi Zair Smedlâyevniñ qardaşı olğan Tair Smedlâyev oktâbr 22 künü Eski Qırımda yaqalanıldı. Smedlâyevniñ maşinası «politsiya hadimleri» tarafından toqtatılğan edi.

İnsan aqları boyunca qırım eyyetniñ mütehassısları işbu iş «siyasiy sımarış» ve Tair Smedlâyevniñ işi boyunca mahkeme ketişatında bir sıra bozuluvnıñ olğanını qayd eteler.

XS
SM
MD
LG