Qırımda keçirilgen mitinglerniñ iştirakçilerine basım kösterilmekte, İnsan aqları boyunca qırım eyyetniñ mütehassısları mında siyasiy sımarış olğanını qayd eteler.
Böyleliknen şirkette noyabr 14 künü qabul etilgen Qırım Appelâtsion mahkemesiniñ qararını izaatladılar. Oña köre, mayıs 3 künü Qırım sıñırında qırımtatarlarnıñ yetekçisi Mustafa Cemilevniñ qarşılav tedbiri vaqtında polis hadimine ücüm etkeninde qabaatlanğan qırımtatar faali Tair Smedlâyev apiste qalmalıdır.
«Tair Smedlâyevniñ işi boyunca mahkeme ketişatında bir sıra bozuluv qayd etildi. Şu bozuluvlar adaletli mahkeme taqiqat aqqınıñ sıñırlanuvı ve uquqiy qoruv vastası boyunca aqlarnıñ bozuluvını belgileyler», – deyler eyyet azaları.
Mında şunı da qayd eteler ki, keçken afta devamında Mustafa Cemilevni qarşılav tedbirde iştirak etken daa üç insan apiske alındı. Olarnı «politsiya hadimlerine» ücüm yapılıvunda qabaatlaylar.
Uquq qoruyıcı Aleksandra Krılenkova bu tedbirlerde siyasiy sımarış hususiyetlerni köre.
«Biz mayıs 3 künü numayışta iştirak etken bir 100 insan ile qonuştıq. Mayıs 3-de politsiya hadimlerine etilgen ücüm, tertipniñ bozuluvı ve ekstremizm olğanı aqqında aytmağa mümkün degil. Söz toplaşuv ve areket etüv aqlarnıñ akimiyet tarafından bozuluvı aqqında kete. Kelecek taqiqat ve mahkeme ketişatı boyunca müsbet bir fikirler şimdilik yoqtır. Cemiyet içün havf ketirmeycek insanlar apiske alındı. Şimdi içtimaiy destek meselesi müimdir. Rusiye, Ukraina ve dünya tarafından kösterilgen destek insanlarğa öz aqlarını qorçalamağa yardım etmeli», – dep tüşüne uquq qoruyıcı.
Teşkilât reisiniñ muavini Dmitriy Makarov Qırımda daa bir sıra tintüvlerniñ keçirilmesini tahmin ete.
İnsan aqları boyunca qırım eyyeti bu vaqialarnıñ, halqra qaidelerge köre, ögrenilmesini talap ete.
Qırımtatar milliy Qurultayınıñ Merkeziy saylav komissiya reisi Zair Smedlâyevniñ qardaşı olğan Tair Smedlâyev oktâbr 22 künü Eski Qırımda yaqalanıldı. Smedlâyevniñ maşinası «politsiya hadimleri» tarafından toqtatılğan edi.
