İşğal etilgen Qırımda Melitopol devlet universitetiniñ tabiiy-coğrafik fakultetiniñ studentleri dağnıñ üstüne çıqıp, anda Ukraina bayrağını açtılar. Bunı noyabr 13 künü «Mestnıye vesti» bilidirdiler.
Belli olğanı kibi, studentler «Delta» turistik klubınıñ azaları olalar.
«Yarımadanıñ dağları boyunca cayav yürüşni turizm, içtimaiy-iqtisadiy coğrafiya ve ülkeşınaslıq kafedrasınıñ assistenti Lesâ Topalova teşkil etti», – dep yaza neşir.
İşğal etilgen Qırım boyunca yürüş altı kün keçirilmek kerek. Ukrain studentleri yürüşni Demirci köyünden başlap, Cur-cur, Çiginitra, Şelen, Novıy Svet duraqlarında toqtap, raatlana ediler. Umumen, studentler 134 km keçtiler.
«Dağ manzaralarnıñ dülberligi iç bir kimseni pervasız qaldırmadı. Balalar işğal etilgen Qırımnıñ dağı töpesinde Ukraina bayrağını köterip, acayip fotolarnı çıqardılar», – deyler bildirüvde.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
