Noyabr 15 künü, cumaertesi, işğal etilgen Qırım eyyeti Rusiye Federatsiyası prezidentiniñ Qırım federal bölüginde vekâletli temsilcisi Оleg Belaventsev ve Qırımnıñ öz başına tayin etilgen baş-nazir Sergey Aksönov ile rusiyeli Tataristan paytahtı – Qazanğa yol aldı.
Bunı Qırımnıñ öz başına ilân etilgen akimiyetiniñ «ruporı» Krıminform saytı bildire.
«İş ziyaret çerçivesinde Qırım eyyetiniñ azaları Qazan federal universiteti, «Eydos» müendislik merkezi, qazan Agroprompark, «IT-park», «Tehnopolis» ve Himgradnı ziyaret etecekler. Bunıñ ile eyyet azalaraı Gorkiy adına Zedenodopolskiy zavodına baracaq olalar», – denile beyanatta.
Tataristan ükümetiniñ resmiy saytında aşkâr etilgen malümatqa köre, ziyaret neticelerini eyyet azaları Tataristan prezidenti Rustam Minnihanov ile Qazan Kremlinde muzakere etecekler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
