İşğal etilgen Qırımda memurlar jurnalistika saasında küçlü mütehassıslar azırlamaq kerekligi aqqında bildirdiler.
Qırım malümat «nazirliginiñ» İnformatsion siyaset idaresi Facebook saifesinde bergen malümatına köre, Qırımnıñ içki siyaset, malümat ve bağ «naziri» Dmitriy Polonskiy Vernadskiy adına Qırım federal universitetiniñ slavân filologiyası ve jurnalistika fakultetiniñ dekanı Galina Bogdanoviç ile körüşti.
Körüşüvde kütleviy haber vastaları içün mütehassıslarnı azırlav keyfiyetiniñ arttırılması muzakere etildi.
Galina Bogdanoviç Qırım ükümeti ve universitetniñ slavân filologiyası ve jurnalistika fakulteti arasında «konstruktiv dialog müimligini» qayd etti.
«Nazirlikniñ» matbuat hızmeti bildirdi ki, körüşüvde İA «Krıminform» neşiriniñ baş muarriri Maksim Nikolayenko ve «Pervıy Krımskiy» telekanalınıñ baş prodüseri Böris Yemets de iştirak ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
