Link açıqlığı

Qırım müftisi cinayetçilerniñ camini yaqmaq ıntıluvları aqqında: cezasızlıq yañı cinayetlerge yol bere


İşğal etilgen Qırım müftisi Hacı Emirali Ablayev Qoz köyündeki camini ateşke berüvden soñ akimiyet ve cemaatçılıqqa muracaatta bulundı. İşbu muracaatnıñ metni Qırım musulmanları Diniy idaresiniñ resmiy saytında derc etildi.

«1990 senelerinden itibaren, Qırımnıñ tamır musulman halqı – qırımtatarlar – tarihiy Vatanına avdet olmağa başlap, cami ve mezarlıqlarnı ğayrıdan tiklep başlağan soñ, Qırımda musulman diniy obyektlerine ücümlar başlandı: camilerni ateşke bere ediler, musulmanlarnıñ mezarları ve baştaşlarını aqaretley ediler. Bunıñ kibi kederli vaqialar cemaatta milletlerara ve dinlerara kerginlik olmasınıñ sebebi oldı», – aytıla müftiniñ beyanatında.

Emirali Ablayev qayd ete ki, Qırım musulmanları Diniy idaresi musulmanlarnı sabırlı olıp, er daim diger din vekillerine sayğı köstermege çağırğan edi.

«20 yıldan ziyade musulmanlarğa qarşı ne qadar çoq ucumlar olsa da, bir cinayetçi bile cezalanmadı. Buña baqmadan, musulmanlar provokatsiyalarğa iç bir vaqıt tecavuz ile cevap bermegen ediler», – dep qayd etti o.

Qırım musulmanları Diniy idaresi qayd ete ki, «cezasızlıq yañı cinayetlerge yol bere, bizler ise bunıñ şaatları olamız».

Malüm olğanı kibi, noyabr 12-de gece belgisiz şahıslar Sudaq rayonınıñ Qoz köyündeki camini yaqacaq oldılar.

Qırımtatar Milliy Meclisiniñ reisi Refat Çubarov Sudaq rayonınıñ Qoz köyünde camini yaqmaq ıntıluvı işğal akimiyetniñ bütün dünyanıñ qırımtatarlarğa qarşı repressiya ve basqını toqtatmaq talabına açıq bir cevabıdır.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG