Link açıqlığı

İşğal etilgen Aqmescitte şeer nizamnamesi peyda oldı


Aqmescit «şeer şurasınıñ» deputatları bugünki nevbetten tış toplaşuvında «belediye nizamnamesi» adlı vesiqanı qabul ettiler. Bunı Krım Media bildire.

Vesiqağa 32 deputattan 29 kişi rey berdi, eki kişi qarşı çıqtı.

«Şeer şurasınıñ reisi» Viktor Ageyev işbu veisqa belediye akimiyeti içün ğayet emin olğanını bildirdi. Onıñ aytqanına köre, Rusiyeniñ bir çoq şeer akimiyeti, prokuratura ve Qırım Cumhuriyeti ve Aqyar şeeri boyunca Rusiye adalet «nazirliginiñ» baş idaresi vesiqanı azırlamağa yardımcı oldılar. «Nizamname – şeerniñ anayasasıdır, oña köre yaşaycaq, çalışacaq ve aqmescitlilerge yapılğan işimiz boyunca esabat berecekmiz. Şimdilik vesiqanıñ bazı eksiklikleri ola bile de, amma ileride onı deñiştire bilemiz», – dedi Ageyev.

Aqmescit şeer şurasınıñ KPRF «deputatı» Stepan Kiskin mekzür vesiqanı tenqitke oğrattı.

Nizamnameni azırlağan işçi gruppasınıñ reberi Aleksandr Maltsev ise vesiqa boyunca bütün teklifler baqılğanını qayd etti. Bugün vesiqanı Adalet nazirliginiñ «Qırım idaresine» teşkerüvge yollaycaqlar.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG