Link açıqlığı

Qırımdaki FSB reberi: Ukraina ile sıñır hadimlerimizniñ nezareti altında


"Qırım Cumhuriyetiniñ FSB" reberi Viktor Palagin ve "Qırım Cumhuriyetiniñ" prokurorı Natalya Poklonskaya

«Qırım Cumhuriyeti» ve Ukraina sıñırındaki vaziyet Rusiye Federal havfsızlıq hızmetiniñ hadimleri tarafından közetile. Bunı «Qırım Cumhuriyeti boyunca Rusiye Federal havfsızlıq hızmet idaresiniñ» reberi Viktor Palagin cumaaqşamı künü «Qırım federal bölgesinde» FSB organlar yolbaşçıları toplaşuvında bildirdi, dep haber ete RİA Novosti.

Qırımdaki FSB organları yolbaşçılarınıñ birinci şura toplaşuvı cumaaqşaım künü Yaltada Qırımnıñ öz başına ilân etilgen reberlik iştiragi ile keçirildi.

Onıñ qayd etkenine köre, Qırımda FSB terrorizm telükesi, diversion grupplar, ekstremizm ve «akimiyet» organlarında qabarcılıqqa qarşı küreşe.

«Qırım Cumhuriyetiniñ yolbaşçısı» Sergey Aksönov havfsızlıq organları ve cumhuriyet akimiyeti arasında eyi emekdaşlıq olğanını qayd etti. Onıñ aytqanına köre, bunıñ sayesinde «yarımadada eki terakt keçirilmesine» yol berilmedi.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG