Sudaq rayonınıñ Qoz köyünde (Solneçnaya dolina) camini yaqmaq ıntıluvı işğal akimiyetniñ bütün dünyanıñ qırımtatarlarğa qarşı repressiya ve basqını toqtatmaq talabına açıq bir cevabıdır. Böyle bir fikirni Qırımtatar Milliy Meclis reisi Refat Çubarov noyabr 12-de gece olıp keçken vaqia aqqında seslendirdi.
«Noyabr 12-de gece zemaneviy aydutlar, Stalinniñ nesili, Vatanğa avdet olğan qırımtatarlar tarafından qurulğan yañı camini yaqacaq ediler», – dep yazdı Refat Çubarov Facebook saifesinde.
O, 1944 senesi qırımtatar sürgünliginden evel Solneçnaya dolina köyüniñ adı Qoz olğanını hatırlattı.
«1944 senesi mayıs 18-de Qoz bom-boş qaldı. Onıñ bütün sakinleri, qırımtatarları, qırımtatar halqınen beraber, sürgünlikke oğratıldı. 1945 senesi avgust 21-ne ait RSFSR Yuqarı Şurasınıñ Prezidium qararınen Qoz Lagernoye ve Qoz köy şurası ise Lagernovskiy adını taşıp başladılar. Tezden, belki de, «Lagernoye» adı sovet rejimini tolusınen aks ettirgenini añlap, Solneçnaya dolina adını berdiler», – dep yazdı Meclis reisi.
Qırım musulmanları Diniy idaresi noyabr 13-te saba bergen malümatına köre, Noyabr 12-de gece belgisiz şahıslar Sudaq rayonınıñ Qoz köyündeki (Solneçnaya Dolina) camini camini yaqacaq oldılar.
Cami imamı Edem Müslimovnıñ malümatına köre, vaqia noyabr 12-de saat 21-de olıp keçti.
Cinayetçiler pencereni yaqıp, camige kirerek, odunlarnı qaldırdı ve binanıñ birinci qatında ateş açmağa tırıştılar. Cami azbarında yaşağan bekçi bunı kördi. O, cami yanğınına yol bermedi, lâkin cinayetçiler qaçıp kettiler
