Kelecek afta, noyabr 19-da, «Qırım Cumhuriyeti Devlet şurasınıñ» malümat siyaseti, alâqa ve kütleviy bağları komiteti Qırım parlamentinde Kütleviy haber vastaları hadimleriniñ akkreditatsiyası aqqında nizamnameniñ soñki variantını tasdıqlaycaq. Bunı komitet reisi Sergey Şuvaynikov toplaşuvda bildirdi, dep haber ete Krım Media.
Şuvaynikovnıñ aytqanına köre, vesiqa «ğayet qıyın» oldı.
Onıñ bildirgenine köre, endiden soñ kütleviy haber vastalarınıñ hadimleri Rusiye Federatsiyası vatandaşınıñ pasportını köstermek kerekler. «Mında jurnalistlerge Rusiye qanunları boyunca yaşağanımıznı añlatacaqmız, Rusiye qanunları boyunca ise belli bir talaplar bar. Özüñiz de yahşı añlaysıñız, Rusiye Federatsiyasınıñ pasportı soqaqta bile er daim yanıñızda olmalı, şu cümleden devlet müessisesiniñ binasında da», – dedi Şuvaynikov.
Onıñ qayd etkenine köre, jurnalistler bu talapqa riayet etmeli.
Malüm olğanı kibi, artıq Qırım parlamentinde çalışacaq olğan jurnalistler icadiy tahallüs, iş yeri, tasil, tecribe, zenaat, iş ve cep telefon nomeraları, elektron poçtasınıñ adresini bildirmeli.
