Link açıqlığı

Qırımlılarğa Rusiyede olmağan «ukrain» imtiyazları olacağını vade eteler


2015 senesi işğal etilgen Qırım bücetinde Ukraina qanunları boyunca yüksek imtiyaz alğan adamlar içün 2 mlrd 197 mln ruble belgilendi.

Bu aqqında emek ve içtimaiy qoruv «naziri» Yelena Romanovskaya «Qırım Cumhuriyeti Devlet şurasınıñ» sessiyasında ayttı, dep haber ete Krım Media. Onıñ bildirgenine köre, işbu sermiya «Qırım Cumhuriyetinde yaşağan bazı vatandaşlarğa içtimaiy yardım belgilev tedbirleri aqqında» qanun boyunca sarf etilecek. İşbu qanunnı deputatları ekinci oquvda qabul etken ediler.

Rusiyede Ulu Vatan cenkiniñ veteranları mesken-kommunal hızmetlerde 50%-lı endirim alalar, Qırımda olarnıñ işbu masrafları tolusınen ödenecek.

Romanovskayanıñ aytqanına köre, telükeli şaraitlerde çalışqan vatandaşlar yüksek nefaqa almağa devam etecekler. Bundan ğayrı, mezkür imtiyazlar cedveline kirmegen, amma eskiden Ukraina qanunları boyunca berilgen reabilitatsiya sermiyası da Qırım bücetinden ayırılacaq.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG