Ukraina prezidentiniñ qırımtatar halqı işlerinden vekâletlisi, saylavlarda Petro Poroşenkonıñ Blokundan namzet köstergen Mustafa Cemilev Ukraina prezidentniñ cenüp yönelişli qırımtatar batalyonınıñ meydanğa ketirilmesini muzakere etti.
Bunı noyabr 12-de Petro Poroşenko Blokunıñ matbuat hızmeti bildirdi.
«Herson vilâyetinde telükeli bir vaziyet olğanı içün bizler prezident ile cenüp yönelişli qırımtatar birleşmesiniñ meydanğa ketirilmesini muzakere ettik», – dedi Cemilev.
Onıñ aytqanına köre, tahminen 450 qırımtatarı Donbassta farqlı batalyonlarnıñ erkânında terrorizmge qarşı tedbirlerde iştirak eteler.
Qırımtatar halqınıñ lideri qayd etti ki, bu arbiylerniñ soy-sopları Qırımda telüke altında qalıp, yerli akimiyetniñ esirleri olalar. Onıñ qayd etkenine köre, bunıñ kibi askerlerniñ adları gizli olmalı.
Mustafa Cemilev emin ki, qırımtatarlar ve ukrainler beraber olsalar, Qırımnı azat etmege imkân olacaq.
«Qırımtatarlar, elbet de, añlaylar, qırımtatar halqınıñ kelecegi – küçlü mustaqil Ukrainadır», – dep qayd etti o.
Mustafa Cemilevniñ bundan evel aytqanlarına köre, Rusiye siyaseti qırımtatarlarnı işğal etilgen yarımadanı terk etmege mecbur qaldıracaq.
Malüm ki, Mustafa Cemilev, Ukraina Baş prokuraturasına muracaatta bulunıp, Rusiyege hızmet etip başlağan 387 Qırım arbiyine qarşı cinaiy iş açmağa çağırdı.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
