Link açıqlığı

Saatnıñ esas haberi

Rusiye yaqlı qırımtatar siyasetçileri: birinci olmaq içün aq qazanmaq


​ «Devlet şurası» vitse-spikeri Remzi İlyasov (soldan) ve «Qırım birligi» teşkilâtınıñ reisi Seytumer Nimetllayev
​ «Devlet şurası» vitse-spikeri Remzi İlyasov (soldan) ve «Qırım birligi» teşkilâtınıñ reisi Seytumer Nimetllayev

Aqmescit – Vatandaşlarnıñ işançını qazanmaq içün Rusiye yaqlı qırımtatar teşkilâtları özara davalaşıp başladılar. «Qırım» cemaat areketi, «Devlet şurasınıñ reis muavini» Remzi İlyasov «Qırım birligi» teşkilâtınıñ Qurultayğa saylavlarnı keçirmek teşebbüsini teñqid etti. Seytumer Nimetullayevniñ özü ğayesinden vazgeçmeycek, dedi. Mütehassıslar eki teşkilât arasındaki munasebetler kerginleşkenini raqiplik ile añlatalar.

Keçenlerde Saq şeerinde, rusiyeli yarımadanıñ çeşit akimiyet vazifelerinde bulunğan qırımtatarlar teşkil etken «Qırım» teşkilâtı ötkergen toplaşuvda, teessisçilerden biri Remzi İlyasov diger qırımtatar teşkilâtı «Qırım birligi»niñ reberi Seytumer Nimetullayevni teñqid etti. Hatırlatamız, Nimetullayev bir yıldan soñ, daa bir Qurultaynı qurıp, saylavlarnı keçirmege teklif etken edi. Nimetullayevniñ fikirince, şimdiki Qurultay «Ukrainada qurulğan edi, ve Rusiyede de-yüre faaliyet etip olamay».

İlyasov, «Qırım birliginiñ» reisi aytqanlarını saçmalıq kibi adlandırdı. Bundan da ğayrı, «Devlet şurasınıñ» «reis muavini» bu teşkilât tarafından cemaat şurası tiklenilip, yañı Qurultayğa qadar qırımtatar halqnı temsil etmek niyetine çorlandı.

«Şimdiki Qurultayğa qarşı çıqqan teşkilâtlar, yañı Qurultayğa qadar qırımtatarlarnı temsil etecekler, dep pek yañlışlar. Bu boş sözler, doğru degil, saçmalıq. Bu kibi sözlerni tek siyasette iç bir şey añlamağan adamlar ayta bileler», – dep ayttı İlyasov toplaşuvda (ATR telekanalında bildirilgen haber boyunca tekrarlana).

Aynı zamanda «Qırım» vekilleri, bu teşkilât Meclis ve Qurultayğa alternativa olamayıp, yalıñız «saflarnı temizleycek» dediler, amma bunı nasıl yapacaqlarını añlatmadılar.

«Rusiyeniñ eñ büyük tarafdarı»

«Qırım birligi» reberi İlyasovnıñ teñqidine riayet etmedi. Qırım.Aqiqatqa bergen intervyüsında Nimetullayev, yañı Qurultaynı keçirmek niyetinden vazgeçmeycegini ayttı. Ve, daa bir kere qırımtatar halqınıñ keñeşi ukrain zamanında teşkil etilip, onı ğayrıdan rusiyeli şaraitlerge köre, saylamağa kerek, dep ayttı.

«Men bütün ömür Rusiyege qol tuttım. Men – Rusiyeniñ büyük tarafdarı olam, ve işanam, bir eki yıldan soñ, qırımtatarlar rusiyeli qanunlarğa köre yaşap, «sağ ol» dep aytırlar, yaşap, çalışırlar. Men bunda eminim ve bunıñ içün qolumdan kelgenini yapacam», – dep añlattı Nimetullayev. O çoq yıllar devamında Herson vilâyeti Geniçesk rayon devlet memuriyeti yolbaşçısı edi, amma Ukrainanıñ sabıq prezidenti Viktor Yanukoviç qaçqan soñ, Qırımğa köçti.

Nimetullayev bildirgeni kibi, İlyasovnen añlaşıp ola. Amma, «spiker muavini» reberlik yapqan teşkilâtqa qoşulmağa niyeti yoq, dedi. «Remzi İlyasov ve onıñ taqımı akimiyette bulunalar. Adamlar, Qırım içün çalışsınlar, bu seviyede bulunğan adamlarğa ait şeylerni yapsınlar. Olar öz yolunen, bizler öz yolumıznen ketemiz», – dedi Nimetullayev.

«Qırım Birligi» reisi yaqın kelecekte Rusiye prezidenti Vladimir Putin ile körüşip, qırımtatarlarnı qasevetlendirgen meselelerni köterip olacağına işanç bildirdi».

«Toqunılmağan şahıslar yoq»

«İçtimaiy tedqiqatlar İnstitutı» cemaat teşkilâtınıñ müdiri, siyasetşınas Yusuf Kürkçi eki rus yaqlı teşkilât arasındaki añlaşılmamazlıqnı raqiplik ile añlata.

«Qırımtatar yetekçisi» vazifesine yarış daa yekünlenmedi, «Qırım birligi» azalarnı faal arttırğanı, Aziz Abdullayevniñ (teşkilâtnıñ sabıq azası. – Müel. qaydl.) taqımını bayağı qorquzdı, çünki Nimetullayev qırımtatar «siyasetçileri» içün yat bir insan, onıñ içün toqunılmaz şahıslar yoq», – dep ayttı ekspert Qırım.Aqiqatqa.

Kürkçiniñ fikirince, «Qırım birligi» reisiniñ esas maqsadı – kendi maliye imkânlarnı, siyasiy imkânlarğa çevirmektir, bu sebepten oña Abdullayev ve İlyasov kibi raqipler kerek, çünki o «1 nomeralı qırımtatar siyasetçisi» rolüne iddia etmekte.

XS
SM
MD
LG