«KrımSOS» teşkilâtında işğal etilgen Qırımdan Kiyevge kelgenler içün qırımtatar tili boyunca kurslar keçirilecek.
Bu aqta malümat «KrımSOS» teşkilâtınıñ Facebook saifesinde peyda oldı.
Teşkilâtta qayd etkenleri kibi, dersler «KrımSOS» ofisiniñ binasında aftada eki kere keçirilecek. Qırımtatar tilini ögrenecek gruppa 10 insandan ibaret olacaqtır.
Derslerge qoşulmaq içün mahsus anketanı toldurmağa teklif etile.
Belli olğanı kibi, Qırımdan ve şarqiy Ukrainadan köçip kelgenler içün «KrımSOS» teşkilâtı tarafından ingliz tili boyunca bedava kurslar teşkil etilgen edi.
«KrımSOS» – 2014 senesi fevral 27 künü Qırım Muhtar Cumhuriyetiniñ işğali başlağanınen göñülliler tarafından teşkil etilgen leyhadır.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
