Türkiye gemi saiplerini işğal etilgen Qırım limanlarına istenmez kirüv aqqında tenbiyelediler.
Bunı Türkiye elçisi Ukrainada Yonet Can Tezel bildirdi, dep haber ete UNİAN.
«İnstitutlarımız Türkiye ve onıñ tışına olğan taşuvlar içün mesülietlidir. Gemi saasınıñ temsilcileri, şirketler, mütenasip agentlikler yapmağa mümkün ve mümkün olmağan şeyler aqqında haberdarlar. Türkiye akimiyeti Qırım işğaliniñ tanılması ile bağlı çeşit türlü bildirüvlerni tanımay. Demek, bizim içün – Qırım – Ukrainadır, mında iç bir şübe olmamalı»,– dey diplomat.
O şunı da qayd etti ki, Qara deñiz büyüktir, şunıñ içün gemilerniñ çoqusı şahsiy sektorlarğa ait. Olardan bazıları kirağa berile ve diger memleket ve şirketler tarafından qullanıla bile, böyleliknen qaidelerniñ bozuluvı peyda ola bile.
Evel haber etilgeni kibi, saba, oktâbr 23-de, Keriç balıq limanında Blue Way türk tanker-gazovozı buluna edi. Teşkerüvge köre, gemi Keriçke oktâbr 9 künü keldi. Bundan ğayrı, işbu tanker Keriçke iyül 5-8 künleri kirgen edi.
Oktâbr 20 kun Türkiye elçisi Ukrainada Yonet Can Tezel türk ticariy gemiler işğal etilgen Qırım ve Türkiye arasında yürmegeni aqqında haber etti.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
