Qırım «Devlet şurası» deputatları noyabr 12 künü keçirilgen toplaşuvda 2015 senesi içün bücetni birinci oquvda qabul ettiler.
Qırım.Aqiqat bergen malümatına köre, kelir ve masraf esapları 62 mlrd 885,5 mln rubleni teşkil ete. Bu kibi qararğa 68 deputattan 67 qol tuttı.
Qırım maliye «naziri» Vladimir Levandovskiy vesiqa leyhasını taqdim etip, bücet qıtlıqsız olğanını ve Qırımnıñ 2015 senesi «müsbet inkişafı» olacağını qayd etti.
«Maliye nazirligi»niñ başı aytqanı kibi, kelirniñ miqdarı 2014 senesiniñ neticelerinden 3 qat büyüktir. Şahsiy kelir miqdarı – 15 mlrd 824 mln ruble, bıltır olğanından eki qat büyüktir, dey «nazir».
Bunıñ ile Rusiye Federatsiyası bücetinden 74% ya da 47 mlrd 61 mln ruble ayırılacaqtır.
Bücet birinci oquvda qabul etildi ve baqılması içün ekinci oquvğa yollanıldı.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
