Qırımtatarlarnıñ milliy yetekçisi Mustafa Cemilev türk çetel işler naziri Mevlüt Çavuşoğlunıñ işğal etilgen Qırımğa, qırımtatarlarnıñ ayatına qıymet kesmek içün, resmiy olmağan eyyetni yollamaq ğayesine qol tuta. O, Qırım akimiyeti buña keder etip olamaycağında emindir.
Bunı Cemilev Qırım.Aqiqat saytına bildirdi.
Onıñ fikrine köre, işğal etilgen Qırım akimiyeti tarafından yarımadağa nezaret taqım azalarınıñ yollanması meselesinde Türkiyeniñ Rusiyege olğan tesiri yetecektir.
«Türkiyeniñ Rusiye ile olğan ticariy munasebetlerniñ sebеbinden anda Türkiyeniñ talaplarına daa da diqqatlı olacaqtırlar. Amma yol bermeseler, türk toplulığı buña seslenir, dep tüşünem», – dedi Cemilev.
Нoyabr 10 künü Kiyevde Mevlüt Çavuşoğlu jurnalistlerge Türkiye Qırım tamır halqınıñ yaşayış şaraitlerini ögrenmek maqsadı ile yarımadağa resmiy olmağan eyyetni yollay bilecegi aqqında bildirdi.
İşğal etilgen Qırımda ayırım ve repressiyalar aqqında ukrain ve halqara uquq qoruyıcı teşkilâtlar ep aytmaqta. Ukraina çetel işler nazirliginde bu vaziyetni «ekinci sürgünlik» olaraq adladılar. Mında eminler ki, Qırımda repressiyalarnıñ ögüni almaq vazifede yalıñız halqara toplulığı yardımcı ola bile.
