Link açıqlığı

Ukraina kinoteatrlarında qırımlı Camala iştiragi ile çıqarılğan filmniñ numayışı başlandı


Noyabr 12-den Оles Saninniñ «Povodır» adlı tarihiy dramasınıñ numayışı başlandı. İşbu filmniñ baş qadın rolüni ukrain yırcı, qırımlı Camala oynağan edi.

Azatlıq Radiosı bergen malümatına köre, noyabr 11 künü filmniñ müelifleri «Povodır»ge Amerikada olğan destek aqqında bildirdiler. Çünki filmde aks etilgen adiseler Rusiye tarafından olğan telüke ile bir sırada kele. Çetel vatandaşları bu filmni seyir etip, ukrainliler «Berkut»qa qarşı iç bir silâsız çıqmağa azır olğanlarınıñ sebebini añlaylar, dey rejissör Sanin.

Yırcı Camala «Povodır»de baş qadın rolüni – yır sanaatı boyunca zenaatdaşı olğan Оlga Levitskayanı icra etti. Camalanıñ aytqanı kibi, Sanin onıñ Оlga ile bir zenaatı olmağanı sebebinden qasevet çekmemege çağırdı – eñ esası, Camalağa Оlganıñ ömür yolunı, göñlüni is etmek kerek edi.

«Ömür mevamı: özüne nasıl bir munasebet bekleseñ, aynı şekilde digerlerge de davran. Olga ise başqa bir insandır. Siz oña «pek güzel yırladıñız» deseñiz, o: «sağ oluñız, men bilem» degen bir cevabını qaytarır edi», – dey Camala.

Filmniñ negizinde – amerikalı oğlançıqnıñ ve ukrain kör çalğıcınıñ sovet akimiyetiniñ repressiyaları vaqtındaki seyahatı tura. Nevbetteki «Oskar» kinopremiyasında aynı bu film Ukrainanı «yabancı tilli film» namzetliginde temsil etecek.

XS
SM
MD
LG