İşgal etilgen Aqmescitniñ Merkeziy bazarı yanındaki meydanda bütün qanunsız inşaatlarnı yıqacaq olalar. Bunı salı künü, noyabr 11-de, «memuriyet yolbaşçısı» vazifelerini eda etken Gennadiy Baharev şeerdeki inşaat qurucılığınıñ qanunğa riayet etmesini taqiq etken mahsus komissiya toplaşuvında bildirdi, – dep haber ete Qırımnıñ öz başına ilân etilgen ükümet «ruporı» Krıminform saytı.
Berilgen malümatqa köre, böyle bir emirni adamlarğa raat yürmege imkân bermegen inşaatlar açuvlandırğan öz başına ilân etilgen baş nazir Sergey Aksönov berdi.
«Bizler yalıñız cezalarnen sıñırlanmayıq, bizler sert adımlar atamız, yıqacaqmız. Menim Merkeziy bazar meydanını temizlemek avalelerim bar. Bizde yalıñız vesiqalarnı teşkermek içün degil de, temizlemek içün tedbirler olmalı. Bu bizim işimizni aks etecektir, ve biz bunı yaparıq», – dep qayd etti Baharev.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
