Link açıqlığı

Cemilev: Qırımtatar Milliy Qurultayınıñ yeri daa belgilenmedi


Qırımtatar Milliy Qurultayı keçirilecek yeri ve tarihı daa belgilenmedi, işbu mesele muzakere etile. Bu aqqında salı künü, noyabr 11-de, qırımtatar halqınıñ lideri Mustafa Cemilev bildirdi, – dep haber ete QHA haber agentligi.

Onıñ qayd etkenine köre, Qurultay keçirilecek bir qaç yer bar, şu cümleden Türkiye, lâkin bunıñ menfiy ve müsbet taraflarını ögrenmek kerek.

«Türkiye teklif etti, ola bile, dep ayttı, lâkin bütün delegatlar Qırımğa keri qaytıp olur, dep bir kimse kefil etip olamay», – dep qayd etti o.

Cemilevniñ fikirince, Qırımda da Qurultay delegatlarınıñ havfsızlıq kefaleti yoq.

«Qırımda keçirmek – bizler ola bilecek kefillerni tasavur etip olamayıq. Kefil eteceklerini aytsalar bile, bunı yerine ketireceklermi-yoqmı belli degil», – dedi o.

Qırımtatar halqınıñ lideri bildirdi ki, esas mesele – Qurultaynıñ yerini belgilemektir.

Qırım.Aqiqat saytı bildirgen edi, Meclis azalarınıñ fikirince, Qurultay Kiyev ya da İstanbulda keçirilse, işğal akimiyeti Qurultay delegatlarını Qırımğa keri almaması mümkün.

Bundan ğayrı, Mustafa Cemilevniñ aytqanına köre, Rusiye Federal havfsızlıq hızmeti Qırımtatar Milliy Qurultayınıñ Kiyevde keçirilmesine kesen-kes qarşı çıqa.

XS
SM
MD
LG