Link açıqlığı

Poroşenkonı içtimaiy ağlardaki fleşmob vastasınen köçip kelgenler aqqında qanunnı imzalamağa çağıralar


Uquq qorçalayıcılar içtimaiy ağlarda aktsiyağa başlap, Ukraina prezidenti Petro Poroşenkonı köçip kelgenler aqqında qanunnı imzalamağa çağıralar. Facebook qullanıcılarına baş resim yerine Petro Poroşenkonı №4490a-1 qanunnı imzalamaq çağıruvı ile resimlerni qoymağa teklif etile.

Bu aqqında Facebookta Seti pravovıh priyomnıh Krıma saifesinde aytıla.

İşbu resimlerdeki yazılar böyle: «Men insanım – aynı aq-uquqlarğa muhtacım», «Men de vatandaşım. Men tasilge devam etmege isteyim!», «Men qırımlım – men Ukraina vatandaşım», «Men Kiyev sakinim, ve köçip kelgenlerniñ taqdiri meni raatsızlay» ve il.

«Deystviye» Qırım uquq qorçalayıcı merkeziniñ koordinatorı Aleksandra Dvoretskaya Qırım.Aqiqatqa bergen malümatına köre, böyle bir adım Poroşenkonıñ imzalanmasına oktâbr 24-te berilgen «Memleket içinde köçip kelgen insanlarnıñ aq-uquqları ve serbestligini temin etüv aqqında» №4490a-1 qanundan sebep atıldı.

«Prezident memuriyetinde olğan tanışlarımıznıñ bildirgenine köre, Maliye nazirligi ve İçtimaiy siyaset nazirligi qanunnı yasaqlap, esnasnı toqtatalar. Virtual aktsiya işbu meseleni darqatmaq maqsadında keçirile», – dedi uquq qorçalayıcı.

Dvoretskayanıñ aytqanına köre, prezident tarafından qanun leyhasını imzalamağanı qanunsızdır, çünki imzalav müddeti noyabr 6-da yekünlendi. Poroşenko ise evlerini mecburen terk etken yarım million insan alâ daa qanun deñişmelerini beklegenleriniñ sebebini añlatmadı.

Oktâbr 20-de Ukraina Yuqarı Radası «Memleket içinde köçip kelgen insanlarnıñ serbestligi ve aqqlarını temin etüv aqqında» Qanunnı qabul etti. Vesiqa insan aqqları, serbestlik ve memleket içinde köçip kelgen insanlarnıñ qanuniy menfaatlarına riayet etüvni belgiley.

Ukraina fevqulâde vaziyetler hızmetiniñ malümatına köre, noyabr 9-na qadar Ukrainada köçip kelgen insanlarnıñ sayısı 455 biñ 175 insannı teşkil ete. İşğal etilgen Qırımdan diger regionlarğa 19 biñ 221 insan köçip keldi, ATO rayonlarından – 435 biñ 954 kişi.

XS
SM
MD
LG