Rusiye Fevqulâde vaziyetler nazirligi Donbass içün daa bir gumanitar yardım kolonnasını aftanıñ soñuna qadar şekillendirmege planlaştıra. Bunı Rusiye FVN yolbaşçı muavini Vladimir Stepanov bildirdi, dep haber ete Azatlıq Radiosı.
Rusiye Donbassta separatistler ve Rusiye ordusı zapt etken yerlerge altı kere bellisiz bir yükni ketirgen edi. Ukraina tarafı buña razılıq bermedi, Qızıl Haç Halqara komitetiniñ vekilleri ise nezaret etmediler.
Noyabr 4-te Rusiye «gumanitar yükü» Rusiye Ukraina sıñırından keçti. Bundan evel, oktâbr 31-de ve noyabr 2-de, Rusiye eki yükni yolladı. Em Ukraina, em de dünya Rusiyeniñ işbu areketlerini sert bir şekilde tenqid ettiler.
RNBO malümatına köre, Rusiyeden kelgen altıncı «gumanitar yardımda» Ukrainada cenkleşecek insanlarnı azırlamaq içün çeşit-türlü donatma ve trenajörlar bar edi.
RNBO bildirgenine köre, Rusiye yük maşinaları Rusiyege keri qaytar eken, ukrain zavodlarından arbiy donatmalarnı çıqara ediler. Aynı bu naqliyat vastalarında da Ukrainada öldürilgen Rusiye askerlerini alıp ketken ediler.
