Qırım «baş naziri» Sergey Aksönov memurlarğa adamlar içtimaiy ağlarda yollağan mesaclarğa diqqat ayırmağa avale etti. Böyle bir avale «Qırım» ükümetiniñ toplaşuvında salı künü, noyabr 11-de, seslendirildi.
Bu aqqında Qırım «Nazirler şurasınıñ» matbuat hızmeti bildire.
«Aqmescitte Semaşko hastahanesini tesadufen ziyaret etken soñ menim Facebook saifemdeki muracaatlar sayısı dört qat arttı. Adamlar esasen tibbiy saa ve Qırım Cumhuriyeti boyunca Federal migratsion hızmet İdaresiniñ meseleleri boyunca muracaatta bulunalar. Bir çoq sualler bala oquv yurtlarında sıcaq aş, mesken-kommunal hocalıq, em de emek ve aylıq meselelerinen bağlı oldı, – dedi Aksönov. – Aytılğan meselelernen oğraşqan bütün reberlerni buña diqqat ayırmağa rica etem».
O, onıñ bu emirlerini vaqtında yerine ketirmege ve bu esnasqa uquq qoruyıcı organlarnıñ vekillerini qoşulmağa çağırdı.
