Ukraina prezidenti Petro Poroşenko Türkiye tışqı işler naziri Mavlüt Çavuşoğlu ile Kiyevde körüşti. Poroşenko qırımtatar halqınıñ aq-uquqlarını qorumaq içün iş birligini quvetleştirmege çağırdı.
Bunı Ukraina devlet yolbaşçısınıñ matbuat hızmeti bildirdi.
Poroşenko qırımtatarlarnıñ liderleri Mustafa Cemilev ve Refat Çubarovnıñ Qırımğa kiriş yasaqları aqqında hatırlattı. Prezident Türkiye bütün halqara toplulıqnen beraber Rusiyeniñ insan aqları saasında halqara talaplarğa riayet etmegenine cevap berecegine ümüt besley.
Türkiye tışqı işler naziri Ukraina prezidentine qırımtatarlarğa köstergen destegi içün minnetdarlıq bildirdi. Onıñ bildirgenine köre, Türkiye kelecek seneniñ başında keçirilecek Ukraina içün yatırımcılar ve donorlar konferentsiyasında iştirak etmege azır.
Türkiye tışqı işler naziriniñ malümatına köre, Türkiye Qırımnıñ tamır halqınıñ yaşayış şaraitlerini ögrenecek resmiy olmağan eyyetini yollaycaq ola.
Nazirniñ qayd etkenine köre, Türkiye Ukraina topraq bütünligine qol tutıp, Qırım işğalini tanımay ve tanımaycaq.
İşğal etilgen Qırımda ayırım ve repressiyalar aqqında ukrain ve halqara uquq qoruyıcı teşkilâtlar ep aytmaqta. Ukraina çetel işler nazirliginde bu vaziyetni «ekinci sürgünlik» olaraq adladılar. Mında eminler ki, Qırımda repressiyalarnıñ ögüni almaq vazifede yalıñız halqara toplulığı yardımcı ola bile.
Ukraina tışqı işler naziri Pavlo Klimkin bildirgenine köre, Ukraina işgal etilgen Qırımda insan aqlarınıñ bozulması, şu cümleden qırımtatarlarınıñ ğayıp olmasınen bağlı davalarnı halqara mahkemeler içün azırlay.
