İşğal etilgen Qırımda noyabr 10-dan «Rossiya segodnâ» radiostantsiyası işlemege başladı. «Sobıtiya Krıma» bergen malümatına köre, radiostantsiya «Rossiya segodnâ» devlet şirketiniñ terkibine kire.
Qırım regional bölüginde haber etkilgeni kibi, «Rossiya segodnâ» «programmaları qırım diñleyicilerine tanış olğan alıp barıcılardan, region haberlerinden, Qırım aqqında leyhalardan» ve Sputnik halqara radionıñ rusiyeli köntentinden ibaret olacaq.
«Sputnik auditoriyası – dünyada yaşağan millionlarnen insanlardır, eminim ki, olarnı bugün radio, gazeta, televideniyede olğan meynstrim-teşviqat qozğalta. Bu kibi teşviqat açıqtan-açıq halqara uquqnı, doğrulıqnı ve real faktlarnı bozıp köstere. İnsanlar başqa bir noqtaiy-nazarnı qıdıralar, biz de Sputnik radiosignalını dünyağa tarqatıp, olarğa şunı teklif etemiz. İhtiyac bar», – dep bildirdi «Rossiya segodnâ» baş müdiri Dmitriy Kiselev.
Neşirniñ bergen malümatına köre, al-azırda «Rossiya segodnâ» Qırımda künde dört saat çalışa, ileride sekiz saatlıq efirge keçmege planlaştırıla, bunıñ ile Aqmescitte matbuat-merkezniñ ve şahsiy saytnıñ açılması közde tutıla.
