Qırım jurnalisti Osman Paşayev yaqın kelecekte Ukraina milliy telekompaniyasınıñ (NTKU) haber yayınlavınıñ reberi olacaq, dep haber ete Telekritika.
Bu malümatnı neşirge NTKU baş müdiri Zurab Alasaniya tasdiqladı.
«Osman Paşayev NTKU haber yayınlavınıñ inkişafını idare etecek. Vazifesiniñ resmiy adını bugünki toplaşuvda belgilecekmiz»,– dedi o.
Şimdi Birinci milliy telekanalnıñ haber yayınlavını baş müdir muavini Darya Yurovska idare ete, haberlerniñ baş muarriri Svitlana Kolâda ola.
Osman Paşayev GTRK «Krım» qırımtatar tilli leyhalarnıñ alıp barıcısı olıp çalışmağa başladı, soñra GTRK «Krım» «12 minut novostey» studiyasında mühbir olaraq işledi. 2001 senesinden Kiyevde jurnalist olıp çalışqan edi.
2011 senesi avgust 1-den Aqmescitte ATR qırımtatar telekanalınıñ haber hızmetiniñ yolbaşçısı edi. Kanalnıñ Türkiyede şahsiy mühbiri olaraq faaliyetini devam etti. CrimeanOpenCh şahsiy internet-kanalınıñ saibi edi. Qırımnıñ işğalinden soñ Türkiyede köçip ketti.
