Link açıqlığı

Klimkin qırımtatarlarınıñ ğayıp olması aqqında: bu deşetni toqtatmaq kerek, Ukraina halqara mahkemeler içün davalarnı azırlay


Ukraina işgal etilgen Qırımda insan aqlarınıñ bozulması, şu cümleden qırımtatarlarınıñ ğayıp olmasınen bağlı davalarnı halqara mahkemeler içün azırlay, dep bildirdi Ukraina tışqı işler naziri Pavlo Klimkin 5-inci kanalnıñ efirinde.

«Şimdi bizler Qırımda olıp keçken vaqialarnen bağlı bir sıra muracaatnı halqara mahkemeler içün azırlaymız. Men insan aqlarına riayet etüvnen bağlı olğan şeylerni aytam. Er kün qırımtatarlardan birisi ğayıp ola, bu deşetni toqtatmaq kerek. Bu deşetni mümkün olğan er bir usuldan faydalanıp, BMT başlap İnsan aqları boyunca Avropa mahkemesiniñ yardımınen toqtatmaq kerek», – dedi Klimkin.

«Qırımnen biz daa selâmlaşırıq. Bu yalıñız tışqı işler naziriniñ lafı ya da bir de bir şiarları degil. Qasevetlenmeñiz. Mence, Qırımda olğan fikirlerge baqsaq, olar pek tez deñişeler. Ve adamlar, şu cümleden rus tilli insanlar, olarnı beklegenlerni añlap başladılar», – dep qayd etti nazir.

Onıñ aytqanına köre, mezkür davalar Ukrainanıñ Rusiyeniñ Qırım işğali aqibetinde körgen zararlarınen bağlı olacaq.

Qırım işğalinden soñ yarımadada adamlar sıq-sıq ğayıp olıp başladı. Sentâbr 22-de Qarasuvbazar rayonında eki qırımtatarını esir aldılar. Bir afta soñra Kezlevde 25 yaşında Edem Asanov ğayıp oldı. Bir qaç künden onı asılğan alda taptılar. Oktâbr 3-te Büyük Onlar qasabasında Eskender Apselâmov ğayıp oldı. Aqşam üstü erkek Aqmescitteki Trubaçenko soqağında yaşağan kiradan çıqıp, işine yol tuttı. Lâkin işke öyle de kelmedi.

Qırım «Nazirler şurası» yanında ğayıp olğan qırımtatarlarnıñ işlerinen oğraşqan kontakt gruppası meydanğa ketirildi.

İnsan aqları boyunca Avropa mahkemesi Ukrainanıñ Rusiyege qarşı üç işni baqa. Olardan ekisi Qırımnen bağlı.

XS
SM
MD
LG