Link açıqlığı

Cuma künü, noyabr 7-de, aqyar kommunistleri Oktâbr inqilâbınıñ yıllığı munasebeti ile Nahimov meydanına çıqıp, Rusiye Federatsiyasınıñ akimiyetine öz muhalif nazarını bildirdi.

Qırım.Aqiqat mühbiri aytqanı kibi, toplaşqanlarnıñ ögünde çıqışta bulunıp, RFKF Aqyar şeer komitetiniñ birinci kâtibi Vasiliy Parhomenko yaqında qayd etilgen «Halq birligi künü»ni tenqit etti ve kommunistler «öz halqını fuqarelikke tüşürgenler ile birleşmeycegini» ilân etti.

Parhomenkonıñ sözlerine köre, Rusiye vatandaşları fuqarelikte yaşağan vaqıtta, memleketniñ zenginligi bir qaç insannıñ ellerindedir.

Oña komsomol şeer komitetiniñ birinci kâtibi Aleksandr Çeremnov de qol tuttı ve «Rusiye iqtisadiyatı ğaypı olğanını» qayd etti. Bunıñ ile firqa bayraqları altında Rusiyede «öligarh rejimini yoq etmege» söz berdi.

Mitingniñ rezolütsiyasında iştirakçiler Rusiye Federatsiyasınıñ akimiyeti «bugünki buhran ve ğarbiy cezalarnıñ ağırlığını adiy işçilerge yüklemege» istegenini qayd ettiler.

«Böyle siyaset ile yollarımız farqlıdır»,– denile rezolütsiyada.

Kommunistlerden ğayrı mitingde «Krasnaya gvardiya Spartaka» teşkilâtınıñ azaları da iştirak etti, olar toplaşuvğa «Birinci duşman – öz memleketindedir!» degen şiarı ile keldiler.

Mitingniñ soñunda iştirakçiler Nahimov meydanından Lazarev meydanına qadar kollonalar ile keçtiler, soñra ise evlerge qayttılar.

Narazılıq iştirakçileriniñ işine politsiya qarışmadı.

XS
SM
MD
LG