Qırım ve Ukraina şarqından köçip kelgenlerniñ ekinci bütünukrain forumı 2014 senesi dekabr 5 künü Kiyev şeerinde ötkerilecek, tahminen 200 iştirakçiniñ kelmesi beklenile.
Bunı işğal etilgen Qırımdan köçip kelgenlerniñ meseleleri ile oğraşqan Qırım diasporası cemaat teşkilâtı bildire.
Teşkilâtta qayd etilgeni kibi, forum bütündünya göñüller kününe ve Budapeşt memorandumı imzalanuvınıñ 20 yıllığına bağışlana.
Forumnıñ işinde mecburen köçip kelgenler, cemaat ve halqara teşkilâtlarnıñ azaları, uquq qorçalayıcılar ve göñülliler, delvet tertibatlarnıñ ve yerli idare organlarnıñ vekilleri, Ukraina halq deputatları, mütehassıslar, jurnalistler iştirak etecek.
Tedbirniñ çerçivesinde köçip kelgenlerge milliy ve regional yardım programmalarnıñ numayışı olacaqtır.
«İştirakçiler tecribeleri ile paylaşır, köçip kelgenlerge yardım kösterüv imkânlar ile tanış olur ve olarnıñ esas meseleleriniñ çezüv yollarınıñ belgilenmesinde iştirak eter», – deyler teşkilâtta.
Tedbirde iştirak etmege istegenlerni noyabr 17-ne qadar arizalarnı toldurmağa çağıralar.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
