Qırımda Rusiyeniñ işğalinden evel qayd etilgen 3 biñ matbuat vastasından tahminen 250 qalacaq.
Bunı Qırım ve Aqyar boyunca Roskomnadzor idaresiniñ «yolbaşçısı» Sergey Hudoley bildirdi, dep haber ete öz başına tayin etilgen Qırım akimiyetine yaqın olğan Krıminform saytı.
«Menimce, Qırımda tahminen 250 matbuat vastası qalacaq», – dedi o.
Hudoleyniñ aytqanı kibi, kütleviy matbuat vastaları ğayrıdan qayd etüvge vesiqalarnı bermege devam eteler.
«Kütleviy matbuat vastaları vesiqalarnı bermekteler – aftada 6-7 vastanı qayd etemiz»,– dedi o.
O şunı da qayd etti ki, ğayrıdan qayd etilmek teklifke daa ziyade neşriyatlar seslendi.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
