Ukraina Yuqarı Şurasında qırımtatarlarnıñ sayısı müim degil, olarnıñ qanun çıqarıcı teşebbüsinıñ nasıl olması, Ukraina qavmiy siyaseti ve tamır halqınıñ vaziyeti ile bağlı meselelerde oynacaq rolleri emiyetlidir, dep tüşüne qırımtatar milliy Meclis azası Eskender Bariyev.
Bunı o, öz Facebook saifesinde bildirdi.
«Mustaqil Ukraina tarihı devamında parlamentte Ukraina tamır halqınıñ eki, üç, bir vekili bar edi, amma bu yalıñız siyasiy añlaşmalar vastası ile yapıla edi», – dep yaza Bariyev.
Bugün, dey o, tamır halq siyasiy firqa olamaz, şunıñ içün Ukraina Yuqarı Şurasında onıñ temsilciligini yalıñız siyasiy añlaşmalar ile çezmege ve halqnı elektorat kibi tanımağa mümün degil.
«Şimdi qırımtatarlarnıñ büyük bir qısmı saylavlarda iştirak etmegenini köz ögümizge alsaq, olarnı öz cedveline qoşacaq bir siyasiy küç olmaycağını da tahmin etmek mümkün, yani Mustafa Cemilevniñ rağbeti olmasa edi, eminim ki, cedvelde qırımtatar temsilciligi aslında olmaz edi. Tamır halqnıñ temsilciligine devlet seviyesinde bir yanaşuv olmalı», – dey Bariyev.
Onıñ fikrine köre, qırımtatar halqınıñ temsiliy organına qanun çıqarıcı teşebbüsniñ taqdim etilmesi ğayet müim bir rol oynay ve qanuniy yollar ile çezilmeli.
«Misal içün, 2 ya da 5 deputat mandatı, qırımtatarlar qayd etilgen qırımtatar namzetlerinden öz vekillerini saylaylar, siyasiy küçler ise bu mandatlarğa iddia etmeyler. Soñra kim kimge ayaq çaldı degen sualler de olmaycaq», – dep tüşüne Meclis azası.
Noyabr 10 künü Ukraina Merkeziy Saylav Komissiyası saylavlarnıñ tam neticelerini aşkâr etecektir. Siyasiy firqalarnıñ cevdellerine üç qırımtatarı kirsetilgen edi, «Blok Petra Poroşenko» cedvelinde 5-nci yerde Mustafa Cemilev ve 71-nci Refat Çubarovnıñ namzetleri bar edi. «Narodnıy front» cedveline Ernest Suleymanov kirsetilgen edi.
Oktâbr 26 künü Ukrainada müddetten evel parlament saylavları keçti. Umumdevlet çoq mandatlı saylav bölüginde «Narodnıy Front», «Blok Petra Poroşenko» birincilikni qazandı. Soñra «Samopomiç», «Oppozitsionnıy blok», Radikalnaya partiya Оlega Lâşko ve «Batkіvşçin»a firqaları kete.
Qırımtatar milliy Meclisiniñ bir sıra temsilcileri ukrain siyasiy firqalarnıñ cedvellerinde Qırım tamır halqı vekilleriniñ az olğanı ile bağlı öz hoşnutsızlığını bildirgen edi. Qırımtatar milliy Meclis reisi Refat Çubarovnıñ cedveldeki yeri boyunca ğayet büyük açuv bar edi.
