Praga soqaqlarında qırımtatarlarnıñ milliy lideri Mustafa Cemilev ile bilbordlar peyda oldı, dep haber ete Novoye vremâ.
Neşirniñ malümatına köre, beş levha ve bir elektron ekran şeerniñ körünli yerlerinde yerleştirildi.
Cemilevniñ fotoresimi altında onıñ Çehiya prezidentiniñ Qırım işğaline razı olmaq aytqanlarına cevabı yazıldı.
«Men 1968 senesi Sovetlerniñ Çehoslovakiya işğaline qarşı narazılıq köstermek içün 3 yıl apiste yattım. Şimdi Çehiya prezidenti Qırım işğalinen razı olmağa çağıra», – dep yazıla bilbordlarda.
Sentâbr ayında Çehiya prezidenti Miloş Zeman Ukrainada barışıq omlasına çağırap, «Qırımnıñ Rusiye terkibine kirsetilmesinen razı olmağa» çağırğan edi. Onıñ fikirince, «bütün deklaratsiyalarğa baqmadan, yaqın zamanda onı Ukrainağa keri qaytarmaycaqlar».
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
