İşğal etilgen Qırımda ukrain bağ operatorlarına litsenziyasız çalışmağa ruhset berilgen müddet qısqartıla bile. Rusiye alâqa nazirligi bunıñ teşebbüsçisi olıp, mezkür müddetni 2017 senesi dekabr 31-den 2015 senesi mayıs 1-ne qadar deñiştirmege teklif etti.
Bu aqqında Rusiye ükümetiniñ yarımadada bağ hızmetlerini kösterüv hususuyetleri aqqında qararında aytıla, – dep haber ete TASS.
Berilgen malümatqa köre, operatorlar 2015 senesi yanvar 1-ne qadar Roskomnadzor idaresine köstergen faaliyetleri, ağnıñ tehnologik imkânları, köstergen hızmetleri ve müşterilerniñ sayısı aqqında malümatnı yollamaq kerekler.
Vesiqada bağ operatorlarınıñ Rusiye qanunları boyunca çalışmağa azır olğanları aqqında beyanat olmalı.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
