İşğal etilgen Qırım akimiyeti Krımhleb şirketini Ukraina şarqında keçirilgen terrorizmge qarşı tedbirlerniñ maliye etilmesinde şekley. Bunı noyabr 6-da Qırımnıñ «Qabarcılıqqa qarşı küreş komitetiniñ» qabarcılıqqa qarşı teşkerüvler boyunca idare yolbaşçısı Dmitriy Prostakov bildirdi.
Qırımnıñ öz başına ilân etilgen ükümet «ruporı» Krıminform saytı bergen malümatına köre, Prostakov «şirket parası Ukrainağa ketkenini isbatlağan vesiqalarnı» taqdim etti.
Onıñ aytqanına köre, komitetniñ malümatına köre, un satın alınmasına belgilengen 75 mln ruble Ukrainağa çıqarıldı.
«Demek, bizler sizlernen, lezzetli Qırım ötmeginiñ bir tilimini aşap, Kiyevniñ Ukraina cenüp-şarqında yapqan areketlerini maliye etemiz», – dedi Prostakov.
Aqmescit boyunca bergi inspektsiyasınıñ idare vekili Oleg Petrovnıñ malümatına köre, olar şirket faaliyetini teşkerdiler.
«Bir sıra bozuvlar qayd etildi, şu cümleden şirket sermiyasınıñ vesiqasız masrafları, em de hadimlerden fizik şahıslardan olaraq bergi alınmadı. Bundan sebep teşkerüv aktları tizildi. Bizler bergi kelmegenine qadar para miqdarını bekleymiz», – dedi Petrov.
Berilgen malümatqa köre, Qırımnıñ öz başına ilân etilgen baş naziri Sergey Aksönov bildirdi ki, Krımhleb şirketi ve Aqmescit ötmek mahsulatı kombinatınıñ devletleştirüv meselesi baqıla.
Hatırlatamız, Qırım «akimiyeti» «Krımavtotrans» şirketiniñ zorlap satın alınması aqqında qarar aldı. Bundan ğayrı, İgor Kolomoyskiyniñ strukturalarına ait olğan obyektler ve mal-malk devletleştirildi.
