İnsan aqları boyunca Avropa mahkemesi baqqan «Ukraina Rusiyege qarşı» işlerinden biri qırımtatar halqınıñ lideri Mustafa Cemilevniñ oğlu Hayser Cemilevnen bağlı. Aynı bu iş Qırım mahkemeleriniñ qararlarından şikâyet etmekniñ sebebi ola bile.
Bunı İnsan aqları boyunca Avropa mahkemesiniñ işleri boyunca ükümet vekâletlisi Natalya Sevastyanova Azatlıq Radiosına bildirdi.
«Bu iş ileride işlerniñ ekseriyetinde pretsedent olacaq. Çünki belli ki, şimdi Qırım Muhtar Cumhuriyetinde çalışqan mahkemeler halqara uquq ceetinden mahkeme sayılmazlar. Bu qanunsız alda işğal etilge territoriyadır, ve andaki mahkemeciler – sabıq ukrain mahkemecileri, olar Rusiye Federatsiyasınıñ qanunları boyunca qarar çıqarıp, Ukraina müürini qoyalar. Bu vesiqalar Rusiye Federatsiyasından ğayrı, dünyanıñ iç bir başqa memleketinde tanılmaz», – dedi Sevastyanova.
Şeklengen şahıs olaraq belgilengen Hayser Cemilev Qırım SİZOsında bulunğan edi, lâkin onı Qırımdan Rusiyeniñ Krasnodar ülkesine alıp kettiler.
Sevastyanovanıñ aytqanına köre, Hayser Cemilevni Rusiyege avuştırmaları qanunsız ekstradatsiya sayıla, çünki Ukraina Qırımnı kendi topraqları olaraq tanıy, Mustafa Cemilevniñ oğlu ise Ukraina vatandaşıdır.
İnsan aqları boyunca Avropa mahkemesi Ukraina tarafından Rusiyege qarşı açtırğan üç işni baqa, olardan ekisi Qırımnen bağlı, ve daa biri – Donbasstan Rusiyege alıp çıqarılğan öksüz balalarnen bağlı. Ukrainağa qarşı İnsan aqları boyunca Avropa mahkemesinde iç bir memleket dava açtırmadı. Ukrainanıñ zanınca, Avropa mahkemesi sayesinde işğal etilgen Qırımda ve separatistler zapt etken Donbassta vatandaşlarnıñ aqlarını qorumaq daa da qolay olacaq.
